1.200 miðar til sölu á uppgjörið á föstudagskvöld

Mynd/Egill Bjarni Friðjónsson

„Við verðum með pláss fyrir 1200 áhorfendur á leiknum á föstudag, nóg pláss fyrir alla. Almenn miðasala á Stubb verður opnuð í dag [miðvikudag] og í forsölu á Ásvöllum frá klukkan 12.30 á föstudag,” segir í tilkynningu frá handknattleiksdeild Hauka en þar á bæ búa menn sig undir stærsta leik ársins á Íslandsmótinu í handknattleik, uppgjöri Hauka og Vals um Íslandsmeistaratitilinn í karlaflokki. Miðasala er hafin á Stubb.


Haukar ætla að tryggja að rífandi góð stemning verði í Schenkerhöllinni á föstudagskvöldið hvar mætast munu stálin stinn þegar bundinn verður endi á langt og erfitt keppnistímabil í handknattleiknum.


Schenkerhöll Hauka á Ásvöllum er afar rúmgott í íþróttahús og eftir að rýmkað var á samkomutakmörkunum í gær þá verður pláss fyrir 1.200 manns á leiknum sem væntanlega verður met á þessu keppnistímabili. Haukum er þetta mögulegt þar sem þeir hafa tök á að vera með fjögur hólf sem rúmað getur 300 áhorfendur hvert.


Minnt er á að enn er grímuskylda meðal áhorfenda á íþróttakappleikjum eins og öðrum sitjandi viðburðum sem kallaðir eru.


Valur vann fyrri viðureignina í gærkvöld, 32:29, í Orgohöllinni. Víst er að sjóða mun á keipum í Schenkerhöllinni á föstudagskvöld og vissara fyrir stuðningsmenn að tryggja sér miða í tíma því ekki er mögulegt að bæta við miðum umfram þá 1200 sem komnir eru í sölu.

a>
- Auglýsing -

Nýjustu fréttir

- Auglýsing -