Ekkert verður úr því að hin sænska Zandra Jarvin leiki með handknattleiksliði FH í Olísdeild kvenna á leiktíðinni sem er nýlega hafin. FH hefur komist að samkomulagi við hana um að samningur sem gerður var í sumar verði rift. Þetta kemur fram í tilkynningu sem FH sendi frá sér á Facebook í gærkvöld.
Jarvin, sem stendur á tvítugu og hefur leikið með yngri landsliðum Svíþjóðar samdi við FH í sumar. Hún lék ekki með FH gegn Stjörnunni í fyrstu umferð enda ekki komin með leikheimild. Í vikunni bárust af því fregnir að veikindi hefðu sett strik í reikninginn og orðið þess valdandi að Jarvin væri ekki farin af stað með FH.
Hvort veikindin eða eitthvað annað var þess valdandi að sú sænska og FH-ingar komust að ofangreindu samkomulagi um samningsriftun kemur ekki fram í yfirlýsingu FH frá í gærkvöldi.
Í Twitterfærslu útvarps- og hlaðvarpsþáttarins Handboltinn okkar er því haldið fram ekki hafi náðst samkomulag um uppeldisbætur milli FH og fyrra liðs Jarvin í Svíþjóð.
Hver sem ástæðan er þá er alltént á hreinu að Zandra Jarvin leikur ekki með FH.
