Molakaffi: Gomes, Telma Sól, Polman, Sanad, Berge, Wille

epa09832317 Portugal?s players celebrate after winning the 2023 IHF World Men's Handball Championship Qualification Europe match between Portugal and Switzerland in Guimaraes, Portugal, 17 March 2022. EPA-EFE/HUGO DELGADO
  • Portúgalski landsliðsmaðurinn André Gomes leikur ekki með Melsungen næstu vikur. Hann handarbrotnaði í fyrri leik Portúgals og Sviss í 1. umferð undankeppni HM á síðasta fimmtudag. Hann verður örugglega ekki með portúgalska liðinu þegar það mætir hollenska landsliðinu í umspilsleikjum um HM sæti í 13. og 17. apríl.
  • Telma Sól Bogadóttir hefur skrifað undir tveggja ára samning við Fjölni/Fylki sem leikur í Grill66-deild kvenna. Telma Sól kom til félagsins fyrir yfirstandandi keppnistímabil. 
  • Hollenska handknattleikskonan Estavana Polman yfirgefur Esbjerg í vor. Þetta fullyrti JydskeVestkysten í gær. Óyndi hefur gripið Polman síðustu mánuði og hefur hún nær ekkert leikið með liðinu. Hefur meiðslum verið kennt um og að Polman hafi ekki jafnað sig eftir að hafa slitið krossband í hné sumarið 2020. Mörgum þykir sú skýring ekki halda vatni, ekki síst eftir það móðir Polman talaði yfir framkvæmdastjóra Esbjerg með tveimur hrútshornum innan um almenning á kappleik á dögunum. 
  • Óvíst er hvert Polman heldur en eiginmaður hennar, knattspyrnuþjálfarinn Rafael Van der Vaart er þjálfari hjá knattspyrnuliði Esbjerg. Hann á enn nokkuð eftir af samningi sínum við félagið. 
  • Mohammad Sanad leikmaður Nimes í Frakklandi var í gær úrskurðaður í fimm leikja keppnisbann fyrir að veitast að dómurum og hrinda þeim í viðureign Nimes og Nancy í frönsku 1. deildinni á dögunum. Einnig elti Sanad dómarana inn að dyrum búningsklefa þeirra. Nimes getur áfrýjað refsingunni. Sanad rann í skap eftir að mark hans í lok leiksins var ekki dæmt gilt. Um hefði verið að ræða sigurmark ef það hefði fengið að standa.
  • Christian Berge fráfarandi landsliðsþjálfari Noregs í handknattleik karla segir að aðstoðarmaður sinn, Jonas Wille, hafi allt til brunns að bera til að taka við af sér. Wille er núverandi þjálfari Kristianstad í Svíþjóð og hefur verið aðstoðarmaður Berge síðan Börge Lund sagði starfi sínu lausu á síðasta ári. Norska handknattleikssambandið auglýsti starf landsliðsþjálfara laust til umsóknar á dögunum eins og handbolti.is sagði m.a. frá. Umsóknarfrestur er til 9. apríl. 
- Auglýsing -

Nýjustu fréttir

- Auglýsing -