Molakaffi: Lund, Ómar Ingi, Alex Máni, Sara Björg, Buric, Gottfridsson

Børge Lund verður að öllu óbreyttu þjálfari Elverum í Noregi næstu þrjú ár. Mynd/EPA
  • Børge Lund hefur framlengt samning sinn um þjálfun norska meistaraliðsins Elverum til ársins 2025. Orri Freyr Þorkelsson og Aron Dagur Pálsson leika með Elverum sem mætir Arendal í dag í fjórða úrslitaleik liðanna í úrslitakeppni úrvalsdeildarinnar. Elverum hefur verið yfirburðarlið í norskum karlahandknattleik um langt árabil. Lund tók við þjálfun Elverum fyrir tveimur árum. 
  • Ómar Ingi Magnússon var að sjálfsögðu í úrvalsliði 33. og næst síðustu umferðar þýsku 1. deildarinnar sem valið var í gærmorgun. Ómar Ingi fór á kostum í fyrrakvöld þegar Magdeburg vann Leipzig, 36:31, á heimavelli Leipzig. Hann skoraði 13 mörk og var með fullkomna skotnýtingu. 
  • Hægri hornamaðurinn Alex Máni Oddnýjarson hefur skrifað undir nýjan þriggja ára samning við Fjölni. Alex er mikilvægur hlekkur í liði Fjölnis og er á sínu þriðja ári í meistaraflokki þrátt fyrir ungan aldur. 
  • Sara Björg Davíðsdóttir hefur endurnýjað samning sinn við Fjölni/Fylki. Sara Björg er traustur leikmaður, jafnt í vörn sem sókn liðsins sem leikur í Grill66-deildinni á næstu leiktíð. 
  • Benjamin Buric markvörður Flensburg og landsliðs Bosníu verður frá keppni næstu mánuði eftir að hafa meiðst á æfingu hjá Flensburg á dögunum. Félagið segir í tilkynningu að meiðslin séu svo alvarleg að Buric verður fjarverandi í fyrstu leikjum liðsins á næsta keppnistímabili. 
  • Ekki nóg með það heldur verður Jim Gottfridsson ekki með Flensburg á morgun þegar liðið sækir Füchse Berlin heim í lokaumferð þýsku 1. deildarinnar. Gottfridsson hefur ekki verið með í síðustu tveimur leikjum Flensburg, gegn Lemgo og Bergischer. Hann verður að öllu óbreyttu klár í slaginn þegar nýtt keppnistímabil hefst í byrjun september.

- Auglýsing -

Nýjustu fréttir

- Auglýsing -