„Ég er hrikalega ánægð og um leið stolt af liðsheildinni sem er hreint mögnuð. Ég hef alltaf verið í KA/Þór en aldrei kynnst nokkrum hóp eins og þessum. Þetta tímabil var bara eitthvað annað,“ sagði Aldís Ásta Heimisdóttir, einn Íslandsmeistara KA/Þórs í samtali við handbolta.is í gær eftir að hún og stöllur hennar unnu Íslandsmeistaratitilinn í handknattleik kvenna í fyrsta sinn. Lið KA/Þórs er semsagt þrefaldur meistari á þessari leiktíð.
„Ég hef ekki alveg áttað mig á þessu ennþá enda langt umfram það sem maður gat látið sig dreyma um fyrir keppnistímabilið,“ sagði Aldís Ásta og bætti við að þegar á tímabilið leið þá hafi þó leikmenn liðsins áttað sig á að möguleikinn á að vinna þann stóra væri e.t.v. ekki svo fjarlægur möguleiki.
„Tímabilið hefur verið langt, strangt og skrítið og þegar við mættum hingað í dag kom ekkert annað til greina en að ljúka dæminu. Leggja allt í sölurnar og komast hjá oddaleik. Okkur langaði svo sjúklega mikið í verða meistari. Það sýndi sig í leiknum. Við vorum geggjaðar enda stóðum við allar saman sem einn maður,“ sagði Aldís Ásta Heimisdóttir, Íslandsmeistari með KA/Þór í samtali við handbolta.is.
