Molakaffi: Kavticnik, Feliho, Nágy, Hannes Jón, Zivkovic

Vid Kavticnik leggur skóna á hilluna eftir leik með Nimes í kvöld. Mynd/EPA
  • Slóveninn Vid Kavticnik hefur ákveðið að láta gott heita eftir þetta keppnistímabil. Kavticnik hefur verið atvinnumaður í handknattleik í 21 ár og m.a. leikið 197 landsleiki og tvisvar verið í sigurliði í Meistaradeild Evrópu með Kiel og Montpellier. Kavticnik lék í vetur sem leið með Nimes í Frakklandi. Lokaleikur hans fyrir félagið verður í kvöld á heimavelli gegn Istres í síðustu umferð frönsku 1. deildarinnar. 
  • Rock Feliho fyrirliði franska liðsins Nantes hefur tilkynnt að hann ætli að leggja skóna á hilluna eftir næstu helgi þegar Nantes hefur leikið síðasta leikinn á keppnistímabilinu. Feliho, sem er 38 ára gamall, hefur leikið með Nantes meira og minna frá 2010. Hann þykir vera einn öflugasti varnarmaður sem leikið hefur í franska handknattleiknum. Feliho er ættaður frá Kongó en hefur einnig franskt ríkisfang.
  • Lazlo Nágy íþróttastjóri ungverska stórliðsins Veszprém segir að framundan sé uppstokkun hjá liðinu eftir óviðandi árangur á keppnistímabilinu. Liðinu tókst hvorki að vinna ungverska meistaratitilinn né að komast í undanúrslit Meistaradeildar. Nágy segir uppsögn þjálfarans Davis í fyrradag vera aðeins fyrsta skrefið í átt til mikilla breytinga. Til stendur að tilkynna þær um næstu mánaðarmót. 
  • Alpla HC Hard varð í fyrrakvöld austurrískur meistari í handknattleik karla eftir að hafa öðru sinni unnið HC Fivers í úrslitarimmu liðanna. Þetta er í sjöunda sinn sem Alpla HC Hard vinnur meistaratitilinn. Hannes Jón Jónsson tekur við þjálfun liðsins í sumar.  Núverandi þjálfari, Boris Zivkovic, hefur verið ráðinn KS Azoty-Pulawy sem segja má að sé þriðja besta liðð í Póllandi, er nokkuð á eftir Vive Kielce og Wisla Plock.
- Auglýsing -

Nýjustu fréttir

- Auglýsing -