„Þá er undirbúningi lokið og aðeins beðið eftir því að flautað verði til leiks,“ sagði Arnar Pétursson, landsliðsþjálfari kvenna í handknattleik við handbolta.is fyrir stundu en klukkan 16 verður flautað til fyrsta leiks Íslands af þremur í forkeppni heimsmeistaramótsins í Skopje í Norður-Makedóníu. Leiknum verður streymt á handbolti.is.
Fyrsti andstæðingur Íslands verður landslið heimamanna. „Við vitum vel að á eftir mætum við sterku liði sem fyrirfram er talið sterkasta lið riðilsins. En við förum all in og ætlum okkur í alvöru leik og ná góðum úrslitum,“ sagði Arnar sem mætti með sveit sína til leiks til Skopje seint á sunnudagskvöld og hefur haft síðustu daga til kærkomins undirbúnings.
„Við höfum átt góða daga hér í Makedóníu og náð góðum æfingum. Við erum klár í slaginn,“ sagði Arnar Pétursson, landsliðsþjálfari.
Sem fyrr segir hefst leikur Íslands og Norður-Makedóníu klukkan 16. Honum verður streymt á handbolta.is og á fleiri stöðum.
Á morgun mætir íslenska landsliðið því gríska og landsliði Litháen á sunnudag. Þeir leikir hefjast klukkan 18. Tvö lið af fjórum halda áfram í umspil um sæti í lokakeppni HM.
