Ágætis byrjun hjá Sigvalda

Sigvaldi Björn Guðjónsson leikmaður Vive Kielce. Mynd/Vive Kielce

Sigvaldi Björn Guðjónsson, landsliðsmaður í handknattleik og samherjar hans í pólska meistaraliðinu Łomża Vive Kielce unnu 11. sigur sinn í pólsku úrvalsdeildinni í kvöld þegar flautað var til leiks aftur eftir hlé frá því í desember vegna heimsmeistaramótsins í Egyptalandi.


Kielce vann í dag Kwidzyn á útivelli með tíu marka mun, 34:24, eftir naumt forskot að loknum fyrri hálfleik, 16:14. Sigvaldi Björn skoraði tvö mörk fyrir Kielce í þremur tilraunum en hann lék aðeins í síðari hálfleik.

Łomża Vive Kielce hefur ekki tapað stigi fram til þessa í deildinni og hefur 33 stig. Gefin eru þrjú stig fyrir hvern sigur í pólsku úrvalsdeildinni. Pulawy er í öðru sæti með 27 stig eftir 10 leiki og Wisla Plock situr í þriðja sæti með 24 stig, einnig að loknum 10 leikjum. Þetta eru bestu liðin. Önnur lið standa þeim talsvert að baki.

- Auglýsing -

Nýjustu fréttir

- Auglýsing -