Mótanefnd ákveður sekt Fjölnis

Mynd/Egill Bjarni Friðjónsson

Fjölni verður gert að greiða sekt fyrir að draga lið sitt úr keppni í Coca Cola-bikarnum í handknattleik. Eftir því sem handbolti.is veit best fer ákvörðun Fjölnis inn á borð mótanefndar HSÍ sem mun taka ákvörðun um sektina. Óvíst er hversu há hún verður. Mun það fara eftir því hvort mótanefnd metur að mótið, þ.e. Coca Cola-bikarkeppnin, sé hafin eða ekki.

Meti mótanefnd það að mótið sé hafið er viðbúið að sektin verði hærri en ef hún metur að mótið sé ekki hafið.


Eins og handbolti.is greindi frá í gærkvöld þá ákvað Fjölnir að draga lið sitt úr keppni vegna anna margra leikmanna vegna prófa í háskólum. Til stóð að Fjölnir mætti Herði á Ísafirði vestra í 32-liða úrslitum Coca Cola-bikarsins á þriðjudaginn eftir viku. Ekki tókst að greiða úr málinu með því að færa leikinn yfir á annan dag og þess vegna gripu forráðamenn Fjölnis til þess að draga lið sitt úr keppni.

Fjölnir fær Harðarmenn í heimsókn í Dalhús á laugardaginn í Grill66-deild karla. Hörður er efstu í deildinni en Fjölnir er í þriðja sæti.

Fréttin hefur verið uppfærð þar sem blaðamanni varð á í messunni. Ruglaði hann saman aganefnd og mótanefnd.

- Auglýsing -

Nýjustu fréttir

- Auglýsing -