- Auglýsing -

Ágúst Elí fór hamförum

Ágúst Elí Björgvinsson í leik með Kolding í haust. Mynd/Jón Oddur

Landsliðsmarkvörðurinn Ágúst Elí Björgvinsson átti stjörnuleik í kvöld með KIF Kolding þegar liðið vann granna sína í Fredericia, 31:22, í dönsku úrvalsdeildinni í handknattleik á heimavelli og var valinn maður leiksins annan leikinn í röð.

Ágúst Elí varði 17 skot, þar af eitt vítakast, sem gerir rúmlega 45% markvörslu. Hann var öðrum fremur maðurinn á bak við það að Kolding-liðið skildi liðsmenn Fredericia eftir í rykinu í byrjun síðari hálfleiks. Þegar leikurinn var hálfnaður var aðeins eins marks munur, 13:12, Kolding í vil.

Leikmenn Fredericia vissu ekki á köflum í leiknum hvaðan á þá stóð veðrið þegar mest gekk á hjá Ágústi Elí í marki Kolding.

Hvað eftir annað þá stöðvuðust sóknir leikmanna Fredericia í kvöld á Hafnfirðingnum vaska sem hefur leikið afar vel með Kolding á leiktíðinni en hann flutti til Jótlands frá Svíþjóð í sumar.

Ágúst lét sér ekki nægja að verja eins og berserkur heldur skoraði hann eitt mark.

Með sigrinum fluttist Kolding upp í 7. sæti. Liðið hefur nú sex stig að loknum fimm leikjum en 14 lið eru í dönsku úrvalsdeildinni.

Staðan í dönsku úrvalsdeildinni.

Ágúst Elí Björgvinsson glaður í bragði eftir gott verk með blómvöndinn sem hann fékk að launum fyrir að vera valinn maður eftir stórleikinn gegn Fredericia í kvöld. Mynd/Jón Odddur
- Auglýsing -
- Auglýsing -

Nýjustu fréttir

- Auglýsing -