Áhorfendabann fram á nýár

Mynd/Neistin

Áhorfendabann hefur verið sett á alla íþróttaviðburði, jafnt barna sem fullorðinna í Færeyjum. Gildir bannið til 3. janúar. Bárður á Steig Nielsen, løgmaður Færeyinga, tilkynnti þetta á upplýsingafundi í dag.
Hingað til hafa félögin getað haft takmarkaðan fjölda áhorfenda á kappleikjum en síðast í gær var leikið í úrvalsdeildum karla og kvenna í handknattleik. Framundan eru fleiri leikir í deildunum, bæði um miðja vikuna og um næstu helgi og verður leikið fyrir luktum dyrum.

Færeyingar grípa til ýmissa aðgerða um þessar mundir til þess að koma í veg fyrir að kórónuveiran fari á flug yfir hátíðisdagana sem eru á næsta leiti. Þeir eru minnugir þess þegar veiran breiddist talsvert út eftir Ólafsvøku í lok júlí.
Að þessu sinni verður m.a. afgreiðslutími veitingastaða styttur, mælst er til þess að aðeins einn af hverju heimili fari í matvöruverslanir og þá verða engar guðsþjónustur í kirkjum yfir jólin og fleira í þeim dúr. Nokkuð sem við þekkjum hér heima á Fróni.

- Auglýsing -

Nýjustu fréttir

- Auglýsing -