Áhorfendur verða á leiknum í Tel Aviv

Áhorfendur verða viðstaddir leik Íslands og Ísraels í Tel Aviv á morgun. Mynd/EPA

Reikna má með að nokkur hundruð áhorfendur verði á áhorfendapöllunum í íþróttahöllinni í Tel Aviv á morgun þegar íslenska landsliðið mætir Ísraelsmönnum í undankeppni Evrópumótsins. Verður það í fyrsta sinn síðan íslenska landsliðið lék á EM í Svíþjóð í janúar í fyrra sem það leikur fyrir framan áhorfendur en síðustu landsleikir hafa verið leiknir fyrir luktum dyrum, hvort heldur í undankeppni EM í vetur eða á heimsmeistaramótinu í Egyptalandi í janúar.

Alls voru 700 áhorfendur á viðureign Ísraelsmanna og Litáa í undankeppni EM í Tel Aviv í kvöld en keppnishöllin rúmar 2.700 áhorfendur. Í fáum löndum heimsins hefur gengið hraðar og betur að bólusetja fólk við kórónuveirunni. Ríflega helmingur ísraelsku þjóðarinnar hefur þegar verið bólsusettur. Það gefur tækifæri til þess að veita áhorfendum m.a. aðgang að íþróttaviðburðum.

Ekki verður leyfilegt að selja í hvert einasta sæti í íþróttahöllinni. Eftir því sem handbolti.is kemst næst hefur Handknattleikssamband Ísraels heimild til þess að selja í helming þeirra sæti sem eru í íþróttahöllinni. Sé það rétt gætu orðið allt að 1.350 áhorfendur á leiknum á morgun. Sem fyrr segir voru 700 áhorfendur á leik Ísraels og Litáen í kvöld. Alltént er það opinber tala á leikskýrslu.

Leikur Ísraels og Íslands hefst klukkan 17.30 á morgun og verður í beinni útsendingu RÚV.

- Auglýsing -

Nýjustu fréttir

- Auglýsing -