Alexandra Líf flytur til Noregs

Alexandra Líf Arnarsdóttir leikur í Noregi næstu árin. Mynd/Fredrikstad Bkl.

Handknattleikskonan Alexandra Líf Arnarsdóttir hefur skrifað undir tveggja ára samning við norska úrvalsdeildarliðið Fredrikstad Bkl. Þjálfari liðsins er Elías Már Halldórsson. Alexandra Líf kemur til félagsins frá HK að lokinni tveggja ára veru. Áður hafði hún leikið með Haukum.


Alexandra er öflugur varnarmaður og línumaður sem hefur átt sæti í yngri landsliðum Íslands. Hún er annar leikmaður HK liðsins sem leitar út fyrir landsteinana í sumar en fyrir nokkru skrifaði Jóhanna Margrét Sigurðardóttir undir samning við Önnereds í Svíþjóð.


Fredrikstad Bkl. hafnaði í sjöunda sæti í norsku úrvalsdeildinni á nýliðinni leiktíð en það var fyrsta árið sem Elías Már var við stjórnvölin. Lið félagsins hefur um árabil átt sæti í úrvalsdeildinni.


Fredrikstad er borg í Austfold-fylki í Noregi, við ósa stærstu ár Noregs, Glommu.

Berglind Íris Hansdóttir, markvörður, lék um skeið með Fredrikstad Bkl. leiktíðina 2010/2011.

- Auglýsing -

Nýjustu fréttir

- Auglýsing -