- Auglýsing -
„Það var ógeðslega gaman að spila hér í dag með öllum þessum áhorfendum og fá orkuna frá þeim,“ sagði Thea Imani Sturludóttir, landsliðskona í handknattleik við handbolta.is eftir sjö marka sigur á Tyrkjum í undankeppni EM í handknattleik á Ásvöllum í kvöld, 29:22.
„Mér fannst okkur takast að bæta margt að því sem við þurftum að laga frá síðasta leik við Tyrki á miðvikudaginn. Það skilaði okkur þessum góða sigri,“ sagði Thea sem skoraði tvö mörk og átti þrjú sköpuð marktækifæri til viðbótar.
„Upphafskaflinn var mjög góður hjá okkur. Þar hélst í hendur góður varnarleikur og sóknarleikur. Það var geggjað að bæði atriði gengu upp á sama tíma sem veitti okkur sjálfstraust. Allir voru á sömu blaðsíðu sem skipti mjög miklu máli. Á heildina litið var þetta flott að mínu mati,“ sagði Thea ennfremur.
Með þessum sigri stefnir í að landsliðið fái úrslitaleik um sæti í lokakeppni EM ytra gegn Serbum 23. apríl. „Það er frábært að fá þann leik. Við mætum brjálaðar í þann leik, engin spurning,“ sagði Thea Imani Sturludóttir, landsliðskona í handknattleik í samtali við handbolta.is.
- Auglýsing -
