Allt annað Fjölnislið sem mætti í kvöld

Guðmundur Rúnar Guðmundsson þjálfari Fjölnis segir sínum mönnum til í leiknum í kvöld. Mynd/Þorgils G - Fjölnir handbolti

„Við vorum ekki sjálfum okkur líkir í fyrsta leiknum. Miklar brotalamir voru þá á leik okkar sem við fórum vel yfir og tókst að bæta úr þegar komið var út í leikinn í kvöld,“ sagði Guðmundur Rúnar Guðmundsson þjálfari Fjölnis glaður í bragði þegar handbolti.is hitti hann eftir sigurleikinn á ÍR í umspili Olísdeildar karla í Dalhúsum í kvöld. Lokatölur, 27:23, og þar með jafnaði Fjölnir metin í einvíginu, hvort lið hefur einn vinning. Næsta viðureign verður á fimmtudaginn í Austurbergi.


„Það var allt annað Fjölnislið sem mætti til leiks í kvöld gegn frábæru ÍR-liði. Ég er stoltur af mínum mönnum að hafa snúið við blaðinu eftir 12 marka tap á laugardaginn,“ sagði Guðmundur Rúnar ennfremur.

Fjölnir var með yfirhöndina alla viðureignina í kvöld að því undanskildu að Kristján Orri Jóhannsson skoraði fyrsta mark leiksins fyrir ÍR.

Klárir í bátana á fimmtudaginn

„Við vorum með tök á leiknum frá upphafi en aldrei svo mjög að mér væri rótt. Mér fannst við vera mun betri að þessu sinni eins og ÍR-ingar voru öflugri á laugardaginn í fyrsta leiknum. Sveiflurnar eru miklar á milli leikja. Við verðum að vera klókir og hugsa vel um okkur fyrir næsta leik. Lítill tími gefst á milli viðureigna. Sú næsta verður á fimmtudaginn. Ég leyfi strákunum að anda á morgun og síðan hittumst við á miðvikudaginn og fundum. Svo verða allir að vera klárir í bátana í Austurbergi á fimmtudagskvöld,“ sagði Guðmundur Rúnar sem sagði ástandið á leikmannahópnum vera gott. Þó er ljóst að liðið saknar Brynjars Óla Kristjánssonar sem er fjarverandi vegna meiðsla. Brynjar Óli var einn jafnbesti leikmaður Fjölnis á leiktíðinni í Grill66-deildinni.

- Auglýsing -

Nýjustu fréttir

- Auglýsing -