- Auglýsing -
Sandra Erlingsdóttir fór hamförum á parketinu í Dalumhallen í Óðinsvéum í dag þegar lið hennar EH Aalborg vann DHG Odense, 32:30, í dönsku 1. deildinni í handknattleik.
Sandra skoraði 14 mörk og vissu leikmenn DHG ekki sitt rjúkandi ráð þar sem þeir komu engum böndum yfir Eyjakonuna sem skoraði mörk í öllum regnboganslitum auk þess að vera drjúg í stoðsendingum til viðbótar við að vinna vítaköst. Aðeins eitt skot geigaði hjá Söndru í leiknum. Mörkunum skipti Sandra jafnt á milli hálfleika.
„Ég man ekki eftir að hafa skorað fleiri mörk í einum leik í meistaraflokki,“ sagði Sandra í skilaboðum til handbolta.is eftir sigurinn í fæðingabæ HC Andersen á Fjóni. „Það gekk bara allt upp í dag,“ sagði Sandra ennfremur og var skiljanlega í sjöunda himni.
DHG Odense var marki yfir í hálfleik, 14:13. Sandra sá svo um að snúa leiknum.
EH Aalborg situr í fimmta sæti deildarinnar með 24 stig eftir 19 leiki.
- Auglýsing -
