Andrea Jacobsen fór á kostum í kvöld með Kristianstad þegar liðið gerði jafntefli við Kärra HF á útivelli í lokaumferð sænsku úrvalsdeildarinnar í handknattleik, 26:26. Kristianstad hafnaði í 10. sæti og heldur sæti sínu í 12 liða deild. Kärra HF fellur í Allsvenskan en BK Heid, sem varð næst neðst, tekur þátt í umspili.
Andrea skoraði sjö mörk í níu skotum og átti fjórar stoðsendingar í leiknum í kvöld sem hugsanlega er hennar síðasti leikur með liðinu. Samningur hennar við Kristianstad er senn á enda. Andrea hefur verið hjá Kristianstad í fimm ár við afar góðan orðstír.
Kristianstad í 10. sæti og Skövde sem hreppti níunda taka hvorki þátt í úrslitakeppni um meistaratitilinn né í umspili um fall úr deildinni og segja má að þar með séu liðin komin í sumarfrí.
Tap á heimavelli hjá Lilju
Lilja Ágústsdóttir skoraði eitt mark úr tveimur skotum þegar Lugi tapaði á heimavelli fyrir Skara HK, 23:21. Lugi hafnaði í fimmta sæti úrvalsdeildarinanr og leikur væntanlega við Kungälvs í fyrstu umferð átta liða úrslitakeppninnar. Kungälvs hreppti fjórða sæti.
Sävehof varð deildarmeistari
Sävehof varð deildarmeistari eftir sigur á Stokkhólmsliðinu Skuru í kvöld, 28:24, á heimavelli Skuru. Liðin urðu jöfn að stigum en Sävehof stendur betur að vígi í innbyrðisviðureignum. Skuru er ríkjandi meistari.
