Andrea og Lilja stóðu í ströngu

Andrea Jacobsen handknattleikskona hjá Kristianstad í Svíþjóð. Mynd/Kristianstad Handboll

Andrea Jacobsen landsliðskona í handknattleik var að vanda í stóru hlutverki hjá liðinu sínu Kristianstad í kvöld þegar það vann BK Heid, 31:26, á heimavelli í næst síðustu umferð sænsku úrvalsdeildarinnar. Andrea skoraði fimm mörk og átti fjórar stoðsendingar


Sigurinn var einkar dýrmætur því með honum er alveg ljóst að Andrea og samherjar þurfa ekki að eiga á hættu að leika umspilsleiki um að forðast fall úr deildinni. Það kemur væntanlega í hlut liðsmanna BK Heid.


Kristianstad er í 10. sæti með 11 stig fyrir lokaumferðina. Heid er með sex stig og Kärra HF fimm. Eitt lið fellur beint úr deildinni en liðið í 11. sæti tekur þátt í umspili. Leiktíðinni verður hinsvegar lokið hjá Andreu og félögum eftir lokaumferðina því lið þeirra á enga möguleika á að komast í áttunda og síðasta sætið í úrslitakeppnina um sænska meistaratitilinn.


Lokaumferðin fer fram á mánudaginn. Kristianstad mætir þá botnliði Kärra HF.

Fimm marka sigur hjá Lilju

Lilja Ágústsdóttir skoraði eitt mark þegar Lugi vann Kungälvs HK, 27:22, á útivelli kvöld. Lugi er í fimmta sæti með 24 stig og gæti mætt Kungälvs HK á ný í úrslitakeppninni en Kungälvs HK er einnig með 24 stig í fjórða sæti. Ásdís, systir Lilju, er að jafna sig af krossbandasliti fyrir ári.

Lilja og liðsmenn Lugi taka móti Skara í síðustu umferð deildarinnar á mánudaginn. Skara er í sjöunda sæti.

- Auglýsing -

Nýjustu fréttir

- Auglýsing -