- Auglýsing -
Handknattleiksdómararnir Anton Gylfi Pálsson og Jónas Elíasson dæma sinn þriðja leik í Meistaradeild Evrópu í handknattleik karla annað kvöld þegar Flensburg og Vive Kielce mætast í 11. umferð B-riðils keppninnar í Flens-Arena í Flensburg. Antoni og Jónasi ber að flauta til leiks stundvíslega klukkan 19.45.
Um er að ræða leik dagsins í keppninni en Handknattleikssamband Evrópu sem stendur fyrir keppninni tekur sérstaklega út einn leik í hverri umferð sem sjónum er sérstaklega beint að.
Íslenskir landsliðsmenn leika með báðum liðum og því óhætt að segja Íslendingar verði beggja vegna borðsins í leiknum.
Teitur Örn Einarsson hefur farið á kostum með Flensburg síðan hann kom til félagsins í október, ekki síst hefur Teitur verið aðsópsmikill í leikjum Meistaradeildarinnar.
Haukur Þrastarson og Sigvaldi Björn Guðjónsson leika með pólska meistaraliðinu sem er í efsta sæti B-riðils með 14 stig að loknum 10 leikjum. Teitur Örn og samherjar eru í fimmta sæti með níu stig.
- Auglýsing -
