Arnar Birkir Hálfdánsson átti afar góðan leik í kvöld þegar EHV Aue vann annan leik sinn í röð í þýsku 2. deildinni í handknattleik. Aue lagði Dessauer, 34:26, á heimavelli og hefur þar með mjakað sér frá tveimur neðstu liðum deildarinnar. Liðið er engu að síður enn í fallsæti en þrjú lið falla úr deildinni í vor.
Tveir góðir sigrar í röð hleypa hinsvegar vonum í liðsmenn áður en þeir halda í mánaðarfrí frá leikjum. Hlé verður gert um áramótin í 2. deild eins og í þeirri fyrstu vegna Evrópumótsins sem fram fer í janúar.
Arnar Birkir skoraði fimm mörk í níu skotum í leiknum í kvöld og átti einnig fimm stoðsendingar. Sveinbjörn Pétursson, markvörður, var ekki í leikmannahópi Aue að þessu sinni.
Færeyingurinn Áki Egilsnes var í liði EHV Aue að þessu sinni en hafði sig lítt í frammi.
Staðan:
