Arnar Birkir Hálfdánsson leikmaður EHV Aue í Þýskalandi. Mynd/EHV Aue

Arnar Birkir Hálfdánsson átti stórleik í kvöld fyrir EHV Aue og Sveinbjörn Pétursson stóð sig einnig afar vel í markinu þegar liðið gerði jafntefli við Hamm-Westfalen, 26:26, í þýsku 2. deildinni í handknattleik en leikið var á heimavelli Aue. Rúnar Sigtryggsson er tímabundið þjálfari Aue-liðsins sem situr í 10. sæti af 19 liðum með 11 stig eftir 11 leiki.

Gestirnir jöfnuðu metin þegar tvær sekúndur voru til leiksloka en Arnar Birkir hafði komið heimönnum yfir, 26:25, þegar hálf mínúta var til leiksloka.
Arnar Birkir skoraði 10 mörk í 17 skotum. Ekkert marka sinna skoraði hann úr vítaköstum. Arnar Birkir hefur ekki fyrr á tímabilinu skorað fleiri mörk fyrir Aue-liðið í deildarleik.

Sveinbjörn Pétursson, markvörður. Mynd/EHV/Aue


Sveinbjörn stóð í marki Aue í um 40 mínútur og varði 10 skot, þar af eitt vítakast. Hann var með liðlega 38% markvörslu.


Aue var fjórum mörkum yfir að loknum fyrri hálfleik, 14:10. Vafalaust eru leikmenn liðsins vonsviknir yfir að hafa ekki fengið bæði stigin að þessu sinni.

Þetta var síðasti leikur liðsins í deildinni á leiktíðinni. Nærri heil umferð verður leikin í þýsku 2. deildinni annað kvöld.

- Auglýsing -

Nýjustu fréttir

- Auglýsing -