- Auglýsing -

Arnar tekur við af Harra

Arnar Gunnarsson fyrir miðju ásamt Íslendingunum Felix Má Kjartanssyni og Ágústi Inga Óskarssyni sem léku undir hans stjórn hjá Neistanum í Færeyjum þangað til á dögunum. Myndin var tekin eftir að Neistin tryggði sér sæti í úrslitum bikarkeppninnar. Mynd/Aðsend

Handknattleiksdeild HK hefur samið við Stefán Arnar Gunnarsson um að þjálfa kvennalið félagsins til loka þessarar leiktíðar. Tekur hann við af Halldóri Harra Kristjánssyni sem var látinn taka pokann sinn hjá HK í gær eftir nærri fjögurra ára starf.


Arnari var sagt upp störfum hjá Neistanum í Færeyjum á þriðjudaginn eftir eins og hálfs árs veru.


Arnar hefur áður m.a. þjálfað hjá Fjölni, Selfoss og KA hér á landi auk þjálfunar liða í Færeyjum, Noregi og í Þýskalandi.


HK er í næst neðsta sæti Olísdeildar kvenna með níu stig þegar 15 leikir eru að baki og sex eftir af deildarkeppninni.


„Arnar hefur áður starfað fyrir HK og hefur alla tíð síðan verið í miklum metum hjá félaginu enda fagmaður fram í fingurgóma.


Þegar hlutirnir þróuðust á þann veg að hann var allt í einu á lausu þá lá það beinast við að við myndum reyna það sem við gætum til þess að landa honum.


Að loknu tímabilinu kemur Arnar síðan inn í þjálfarateymið karlamegin og mun sjá um þjálfun 3.flokks karla ásamt því að vera faglegur ráðgjafi deildarinnar,“ segir í tilkynningu frá stjórn handknattleiksdeildar HK.

- Auglýsing -
- Auglýsing -

Nýjustu fréttir

- Auglýsing -