- Auglýsing -
Miðjumaðurinn Arnór Ísak Haddsson og Bruno Bernat, markvörður, framlengdu í gær samninga sína við handknattleiksdeild KA til tveggja ára. Frá þessu greinir félagið í tilkynningu í dag.
„Arnór hefur verið viðloðandi yngri landslið Íslands í gegnum tíðina og Bruno hefur verið einn efnilegasti markmaður landsins. Arnór spilar sem leikstjórnandi og hefur gríðarlegan kraft og sprengju sem varnarmenn andstæðinganna óttast oft og tíðum. Eitt helsta kennimerki Bruno, fyrir utan frábærar vörslur, eru magnaðar sendingar upp völlinn sem gefa oft góð hraðaupphlaupsmörk,“ segir m.a. í tilkynningu frá KA þar sem fagnað er að piltarnir verði áfram í herbúðum KA-liðsins næstu tvö ár, hið minnsta.
KA hafnaði í sjöunda sæti í Olísdeildinni í vor sem leið og tapaði naumlega fyrir Haukum í átta liða úrslitum úrslitakeppninnar. KA-liðið lék til úrslita í bikarkeppninni í mars. Á næstu leiktíð tekur Akureyrarliðið þátt í Evrópukeppni í karlaflokki eftir margra ára fjarveru.
- Auglýsing -
