Arnór og meistararnir á sigurbraut

Aalborg vann sinn þriðja sigur í röð í dönsku úrvalsdeildinni í gærkvöld þegar liðið sótti Ribe-Esbjerg heim á vesturhluta Jótlands, 35:30. Arnór Atlason, fyrrverandi landsliðsmaður í handknattleik, er aðstoðarþjálfari dönsku meistaranna sem tróna nú á toppi deildarinnar.

Rúnar Kárason átti enn einn afbragðsleikinn fyrir Ribe-Esbjerg sem enn hefur ekki unnið leik í deildinni. Rúnar skoraði sjö mörk og átti einnig þrjár stoðsendingar. Hann var markahæstur í liði heimamanna. Gunnar Steinn Jónsson skoraði eitt mark en Daníel Þór Ingason ekkert. Hann átti eina stoðsendingu en Daníel er fyrst og síðast afar öflugur varnarmaður.