Arnór Þór hefur skrifað undir nýjan samning

Arnór Þór Gunnarsson leikmaður Bergsicher HC. Mynd/Bergischer HC

Landsliðsmaðurinn í handknattleik, Arnór Þór Gunnarsson, hefur framlengt samning sinn við þýska handknattleiksliðið Bergischer HC til tveggja ára með möguleika á uppsögn vorið 2022. Frá þessu greinir Arnór Þór í samtali við Akureyri.net í morgun.

Samningur Arnórs Þórs við Bergischer HC átti að renna út um mitt komandi ár. Vegna erfiðra meðsla sem hafa plagað Arnór Þór kom til greina að láta gott heita og flytja heim næsta sumar en ákveðið að láta til leiðast og skrifa undir nýjan samning.

Arnór Þór hefur verið í herbúðum Bergischer HC í átta ár og hefur enginn af núverandi leikmönnum liðsins verið þar lengur.

„Ég var nánast ákveðinn, fyrir um það bil tveimur mánuðum, að segja þetta gott næsta vor. Ég hef verið slæmur í mjöðm í eitt og hálft ár og hafði farið í alls konar athuganir og sneiðmyndatöku, og alltaf var sagt að þetta væru bara bólgur. Þegar ég fór í röntgenmyndatöku kom hins vegar í ljós að brjósk í mjaðmarbeini er byrjað að eyðast og þess vegna myndast þessar bólgur,“ segir Arnór við Akureyri.net.

Þar segir Arnór Þór ennfremur að með breyttu matarræði hafi líðan sín skánað og dregið úr verkjum sem hafi m.a. valdið því að hann ákvað að taka slaginn áfram með Bergischer HC.

- Auglýsing -

Nýjustu fréttir

- Auglýsing -