Aron er ennþá frá keppni

Aron Pálmarsson, leikamaður Aalborg. Mynd/EPA

Aron Pálmarsson verður ekki með danska meistaraliðinu Aalborg Håndbold í kvöld þegar það tekur á móti ungversku meisturunum Pick Szeged í Meistaradeild Evrópu í handknattleik. Aron er ekki á leikskýrslu sem birt hefur verið fyrir leikinn sem hefst klukkan 17.45 í Álaborg.


Þetta er þriðji leikurinn í röð sem Aron tekur ekki þátt í með Aalborgliðinu eftir að hann varð fyrir höfuðhöggi í viðureign Aalborg og Ribe Esbjerg í dönsku úrvalsdeildinni laugardaginn 20. nóvember.

Aalborg er í fjórða sæti A-riðils Meistaradeildar með 10 stig eftir átta leiki. Hörkuslagur er í riðlinum og aðeins munar þremur stigum á Montpellier, sem er efst, og Aalborg í fjórða sæti.


Ólafur Andrés Guðmundsson er í leikmannahópi Montpellier sem fær PPD Zagreb í heimsókn í kvöld. Eins er Orri Freyr Þorkelsson á sínum stað í leikmannahópi norsku meistaranna Elverum sem tekur á móti Meshkov Brest frá Hvíta-Rússlandi í A-riðli

Stórskyttan Teitur Örn Einarsson er klár í slaginn með Flensburg sem sækir Motor Zaporozhye heim til Úkraínu í B-riðli Meistaradeildar. Roland Eradze er að vanda í þjálfarateymi Motor.

Teitur Örn hefur farið mikinn og raðað inn mörkum eftir að hann gekk til liðs við Flensburg fyrir rúmlega mánuði.

- Auglýsing -

Nýjustu fréttir

- Auglýsing -