Handknattleiksmaðurinn Atli Rúnar Steinþórsson, sem samdi á dögunum við Stjörnuna, varð fyrir miklu áfalli á föstudaginn þegar önnur hásin hans slitnaði á æfingu. Atli Rúnar leikur þar með ekkert með Stjörnunni á næstunni en hann lék sinn fyrsta leik með liðinu í síðustu viku þegar Stjarnan tók á móti FH í TM-höllinni.
Eftir því sem næst verður komist fer Atli Rúnar að öllum líkindum í aðgerð á næstu dögum þar sem gert verður við sinina.
Atli Rúnar, sem m.a. hefur leikið með Val, FH, Aftureldingu og Gróttu tók fram skóna fyrr í þessum mánuði eftir að hafa verið frá keppni í handknattleik um nokkurra ára skeið. Hann hafði haldið sér við í millitíðinni með æfingum í crossfit, hjólreiðum og í MMA bardagaíþróttinni.
„Atli Rúnar er toppmaður og ég ætla að fá hann með mér í þjálfaragengið,” sagði Patrekur Jóhannesson, þjálfari karlaliðs Stjörnunnar við handbolta.is í hádeginu.
