Austurríki verður andstæðingur Íslands í HM-umspilinu

Guðmundur Þórður Guðmundsson, landsliðsþjálfari, hugsi. Hann getur nú þegar lagst í undirbúning fyrir leikina við Austurríki í undankeppni HM sem fram fara í næsta mánuði. Mynd/Hafliði Breiðfjörð

Íslenska landsliðið mætir austurríska landsliðinu í tveimur umspilsleikjum í næsta mánuði þar sem í húfi verður þátttökuréttur á heimsmeistaramótinu í handknattleik karla sem fram fer í janúar á næsta ári. Austurríki lagði Eistland, 27:24, í Tallin í kvöld og samanlagt 62:57, í tveimur leikjum.


Fyrri viðureignin verður væntanlega í Bregenz í Austurríki miðvikudaginn 13. apríl og sú síðari á Ásvöllum laugardaginn 16. apríl.


Austurríkismenn voru marki yfir í hálfleik í Tallinn í dag, 14:13. Karl Toom jafnaði metin strax í upphafi síðari hálfleiks, 14:14. Þrátt fyrir ákafar tilraunir komust heimamenn aldrei yfir í síðari hálfleik. Þeim tókst nokkrum sinnum að jafna en Austurríkismenn stóðust áhlaup þeirra, m.a. undir lokin þegar munurinn var aðeins eitt mark, 25:24.

Viðureignir í síðari umferð umspilsins í apríl:
Finnland – Króatía.
Grikkland – Svartfjallaland.
Þýskaland – Færeyjar.
Tékkland – Norður Makedónía.
Slóvenía – Serbía.
Portúgal – Holland.
Ísrael – Ungverjaland.
Austurríki – Ísland.

Leikið verður heima og að heiman frá 13. til 17. apríl.

Belgar tryggðu sér sæti á HM í gær. Þeir hlupu yfir aðra umferð vegna þess að Rússum var vikið úr keppni eftir innrás þeirra inn í Úkraínu.

- Auglýsing -

Nýjustu fréttir

- Auglýsing -