Geir Guðmundsson, leikmaður Hauka, varð fyrir höfuðhöggi í viðureign Hauka og CSM Focsani á Ásvöllum á laugardaginn og hefur verið frá æfingum síðan. Þetta var í annað sinn á innan við ári sem Geir verður fyrir höfuðhöggi í leik. Hann sagði við handbolta.is að batinn nú virðist vera hraðari en síðast.
„Sunnudagurinn var ansi strembinn en mér finnst batinn vera töluvert hraðari en síðast. Miðað við aðstæður er heilsan nokkuð góð,“ sagði Geir sem varð svo óheppinn í leiknum á laugardaginn að hrasa þegar Haukar voru að snúa vörn í sókn eftir um tíu mínútna leik. Þar sem Geir lá á gólfinu datt einn leikmanna Focsani ofan á hann og kom högg af falli Rúmenans m.a. á höfuðið á Geir.
Geir segist reikna með að vera frá um tíma. „Vonandi sem styst. Ég er alveg búinn að fá nóg af þessu,“ sagði Geir Guðmundsson, leikmaður Hauka við handbolta.is.
