Belgar hafa ákveðið að draga landslið sitt úr undankeppni Evrópumóts karla í handknattleik. Ástæðan er kórónuveiran og afleiðingar hennar sem hefur leikið Belga grátt eins og marga aðra. Til stóð að belgíska landsliðið léki þrjá leiki í mars en á dögunum tilkynnti belgíska handknattleikssambandið Handknattleikssambandi Evrópu, EHF, að ákveðið hafi verið að draga landsliðið úr keppni.
Í tilkynningunni segir m.a. að útlit væri fyrir að undirbúningur fyrir leikina þrjá yrði í skötulíki ef hann yrði þá einhver. Með heilbrigði og heilsu leikmanna að leiðarljósi telja Belgar að réttast sé að leggja árar í bát nú þegar.
Belgar drógust í fyrsta riðil undankeppni EM ásamt Frökkum, Serbum og Grikkjum. Þeir voru ekki búnir að leika einu sinni þegar ákveðið var að hætta við þátttöku.
Vegna þessarar ákvörðunar verður belgíska landsliðið að taka þátt í forkeppni fyrir EM 2024 til þess að eiga þess kost að komast í riðlakeppni næstu undankeppni sem leikin verður síðari hluta ársins 2022 og á fyrri hluta árins 2023. Forkeppnin fer væntanlega fram í upphafi árs 2022 á svipuðum tíma og lokakeppni EM 2022 verður leikin í Ungverjalandi og í Slóvakíu.
