Ákveðið hefur verið að fresta keppni í Coca Cola-bikarnum í handknattleik karla og kvenna fram á haust, eftir því sem næst verður komist. Reyndar verður reynt ljúka 32-liða úrslitum í karlaflokki á þessari leiktíð. Einn leikur stendur út af borðinu og hefur gert síðan í byrjun október. Er þar um að ræða leik Hauka og Selfoss sem vonir standa til að hægt verði að koma á dagskrá fyrir lok þessa mánaðar ef lukkan lofar.
Dregið var til 16 og átta liða úrslita í karla- og kvennaflokki í mars og til stóð að leika strax eftir páska. Það lánaðist ekki sökum þess að kappleikjabann var sett á 25. mars. Banninu var ekki aflétt fyrr en í dag.
Hvenær leikið verður í Coca Cola-bikarnum í haust liggur ekki staðfest fyrir, eftir því sem handbolti.is kemst næst. Væntanlega finnast heppilegir dagar sem allir geta sæst á ef að líkum lætur.
