Bjarni Ófeigur Valdimarsson og samherjar hans í IFK Skövde gefa ekkert eftir í toppbaráttu sænsku úrvalsdeildarinnar í handknattleik. Í dag unnu þeir Alingsås örugglega á heimavelli, 34:25, og færðust með sigrinum upp í annað sæti deildarinnar. IFK SKövde hefur 24 stig og er þremur stigum á eftir Sävehof sem fyrr í dag varð sænskur bikarmeistari.
Kristianstad er í þriðja sæti með 23 stig en á tvo leiki til góða á Sävehof og IFK Skövde. Ystads IF, Alingsås og Hammarby eru skammt á eftir.
Bjarni Ófeigur þótti leika vel í dag. Hann skoraði fimm mörk í níu skotum og átti fjórar stoðsendingar. Alls hefur Bjarni Ófeigur skorað 72 mörk í deildinni og átt 38 stoðsendingar.
Góður leikur Andreu nægði ekki
Andrea Jacobsen, landsliðskona í handknattleik, skoraði fimm mörk í 11 skotum og átti tvær stoðsendingar auk þess að vera einu sinni vísað af leikvelli í dag í leik með Kristianstad í sænsku úrvalsdeildinni.
Andrea og félagar sóttu Skara HF heim og töpuðu með minnsta mun, 28:27. Kristianstad var marki yfir í hálfleik, 14:13. Liðið er í 10. sæti af 12 liðum deildarinnar.
