- Auglýsing -
Bjarni Ófeigur Valdimarsson var besti leikmaður Skövde í kvöld þegar liðið gerði jafntefli á útivelli í Önnereds, 29:29, í sænsku úrvalsdeildinni í handknattleik. Bjarni Ófeigur skoraði fimm mörk í níu skotum og átti tvær stoðsendingar.
Skövde var fjórum mörkum undir að loknum fyrri hálfleik, 17:13. Liðið er þar með í fimmta sæti deildarinnar með 20 stig eftir 15 leiki þegar gert verður hlé á keppni í úrvalsdeildinni vegna Evrópumótsins í handknattleik karla. Sävehof er efst með 25 stig eftir 16 leiki og Kristianstad er næst á eftir með 23 stig og á leik til góða á Sävehof.
Bjarni Ófeigur er í 22. sæti á lista yfir markahæstu leikmenn deildarinnar með 64 mörk í 14 leikjum. Hann hefur einnig átt 34 stoðsendingar.
- Auglýsing -
