Bjarni og félagar fóru upp í þriðja sæti

Bjarni Ófeigur Valdimarsson leikmaður Skövde t.v. Mynd/Aðsend

Bjarni Ófeigur Valdimarsson skoraði fimm mörk og átti tvær stoðsendingar þegar lið hans IFK Skövde vann Hammarby IF HF, 29:25, á heimavelli í sænsku úrvalsdeildinni í handknattleik í dag. Bjarni var einnig vísað einu sinni af leikvelli. Hann mætti mátulega til leiks eftir að hafa verið við æfingar með íslenska landsliðinu hér á landi síðustu daga.


Skövde-liðið var með tögl og hagldir í leiknum frá upphafi til enda og hafði m.a. sjö marka forskot að loknum fyrri hálfleik, 17:10.


Ein umferð er eftir í sænsku úrvalsdeildinni. Fyrir hana er Skövde í þriðja sæti með 36 stig. Kristianstad er í öðru sæti með 37 en Sävehof hefur þegar tryggt sér deildarmeistaratitilinn með 41 stig. Átta efstu liðin taka þátt í úrslitakeppni um meistaratitilinn.


Guif, sem Daníel Freyr Andrésson leikur með, situr í níunda sæti og á veika von um sæti í átta liða úrslitum. Til þess þarf Guif að vinna Skövde á heimavelli í lokaumferðinni á miðvikudagskvöld og treysta um leið á að Hammarby tapi fyrir Lugi.

- Auglýsing -

Nýjustu fréttir

- Auglýsing -