Mynd/Stjarnan

Bræðurnir Björgvin og Einar Hólmgeirssynir gengu í gær til liðs við Stjörnuna. Þeir kannast vel við sig í búningi Stjörnunnar enda báðir leikið með félaginu. Einar ætlar þó ekki að draga fram keppnisskóna heldur vera aðstoðarþjálfari hjá Patreki Jóhannessyni sem tók við þjálfun karlaliðs Stjörnunnar í sumar.

Björgvin verður hinsvegar í eldlínunni innanvallar með Garðbæingum en hann hefur síðustu árin leikið með ÍR-ingum eftir að hafa flutt heim frá Dubai hvar hann lék um nokkurt skeið með Al Wasl frá 2015 til 2017. Björgvin lék síðast með Stjörnunni frá 2007 til 2009.

Einar, sem mun sjá um styrktarþjálfun Stjörnuliðsins, lék með liðinu leiktíðina 2013/14 eftir að hafa flutt heim að loknum nokkrum árum í Þýskalandi þar sem hann lék með Grosswallstadt, Hamm, Flensburg og Magdeburg.

Fyrsti leikur Stjörnunnar í Olís-deildinni á keppnistímabilinu verður gegn Selfossi í TM-höllinni í Garðabæ föstudaginn 11. september.

- Auglýsing -

Nýjustu fréttir

- Auglýsing -