Mynd/Raggi Óla

Guðmundur Árni Ólafsson, hornamaðurinn sterki í liði Aftureldingar, fingurbrotnaði í leik Aftureldingar og Stjörnunnar í Hafnarfjarðarmótinu um síðustu helgi. Blær Hinriksson sem gekk til liðs við Aftureldingu frá HK í sumar er ristarbrotinn.

Að sögn Gunnars Magnússonar, þjálfara Aftureldingar, þá er um álagsbrot að ræða hja Blæ. Brotið kom í ljós fyrir um mánuði síðan og er ljóst að hann leikur ekki með Aftureldingu til að byrja með í Olís-deildinni. Keppni í deildinni hefst 10. september og mætir Afturelding nýliðum Þórs frá Akureyri í fyrstu umferð að Varmá.

Óvíst er með öllu hversu lengi Guðmundur Árni verður frá keppni vegna fingurbrotsins. Gunnar þjálfari vonast til að það skýrist betur í kringum helgina.

Fleiri leikmenn Aftureldingar glíma við smávægileg meiðsli, þar á meðal Þorsteinn Gauti Hjálmarsson sem gat ekki beitt sér að fullu í Hafnarfjarðarmótinu í síðustu viku. Gunnar segist vonast til að Þorsteinn verði klár í slaginn þegar keppnistímabilið hefst af fullum þunga.

Gestur Ólafur Ingvarsson, sem sleit krossband annað árið í röð snemma leiktíðar í fyrra er fluttur til Danmerkur og leikur væntanlega ekki með Aftureldingu í vetur, að sögn Gunnars.

- Auglýsing -

Nýjustu fréttir

- Auglýsing -