Britney Cots, FH sækir á milli Aldísar Ástu Heimisdóttur og Rakelar Söru Elvarsdóttur í viðureign KA/Þór og FH fyrir 10 dögum. Mynd/Egill Bjarni Friðjónsson

Þrír af burðarásum kvennaliðs FH í handknattleik glíma við meiðsli og hafa lítið sem ekkert leikið með liðinu í undanförum leikjum. Guðmundur Pedersen, þjálfari FH, sagði við handbolta.is eftir leik FH við Val í gærkvöld að Brietney Cots hafi fengið högg á annað hnéið undir lok leiksins við KA/Þór á Akureyri fyrir 10 dögum. Sigrún Jóhannsdóttir, Fanney Þóra Þórsdóttir og Heiðdís Rún Guðmundsdóttir eru einnig fjarverandi vegna meiðsla.

„Britney er byrjuð að hreyfa sig aftur með okkur en getur ekkert leikið með okkur,“ sagði Guðmundur sem vonast til að hún verði klár í slaginn þegar FH leikur næst í Olísdeildinni um næstu mánaðarmót. Tuttugu daga hlé verður gert á deildarkeppninni eftir að 12. umferð lýkur í kvöld.

FH-ingurinn, Fanney Þóra Þórsdóttir, í opnu færi í leik KA/Þórs og FH og í KA-heimilinu á dögunum. Mynd/Egill Bjarni Friðjónsson

Óvissa um ÓL-forkeppni

Guðmundur sagði óvíst hvort Cots taki þátt í forkeppni Ólympíuleikanna með landsliðið Senegal eins og stendur til. Hún hefur átt fast sæti í landsliðinu undanfarin misseri og æft með landsliðinu í æfingabúðum í Frakklandi. „Það er dagskrá hjá Britney að fara en það verður að koma í ljós síðar í vikunni hvernig staðan á henni verður,“ sagði Guðmundur.


Fanney Þóra Þórsdóttir er fingurbrotin og tók af þeim sökum ekki þátt í leiknum við Val og sömu sögu er að segja um Sigrúnu Jóhannsdóttur sem hefur átt í hnémeiðslum ofan í fingurbrot til viðbótar sem hún var veik í gærkvöld.

Sigrún Jóhannsdóttir, FH, leidd meidd af leikvelli í KA-heimilinu á dögunum. Mynd/Egill Bjarni Friðjónsson

Heiðdís Rún Guðmundsdóttir er einnig frá vegna hnémeiðsla.

Grátlega nærri stigi

Þrátt fyrir fjarveru þeirra sagði Guðmundur að FH-liðið hafi átt afar góðan leik við HK á laugardaginn og verið grátlega nærri að fá að minnsta kosti annað stigið út úr leiknum þrátt fyrir að allir fyrrgreindir leikmenn hafi verið fjarverandi.


„Ég græt ekki tapið fyrir Val en ég græt þá staðreynd að við fengum ekki að minnsta kosti stig á móti HK á laugardaginn. Stelpurnar lögðu mikið í þann leik. Í kvöld vorum við ekki með nema 10 leikmenn gegn Val reyndar eins og á laugardaginn. Það var bara of skammt á milli leikja til þess að fámennur hópur okkar hefði svar gegn frábæru Valsliði. Okkur vantaði fleiri fætur og meiri gæði í þennan leik,“ sagði Guðmundur Pedersen sem tók við þjálfun FH-liðsins 27. janúar af Jakobi Lárussyni.

- Auglýsing -

Nýjustu fréttir

- Auglýsing -