Dæma með sérleyfi yfirvalda í Noregi upp á vasann

Anton Gylfi Pálsson og Jónas Elíasson dæma á EM karla strax á fimmtudag. Mynd/Jóhannes Long

Handknattleiksdómararnir Anton Gylfi Pálsson og Jónas Elíasson eru á leið til Noregs í sitt fyrsta verkefni utanlands á leiktíðinni. Þeir eiga að dæma viðureign Elverum og Flensburg í Meistaradeild karla í handknattleik sem fram á að fara á fimmtudagskvöld á heimavelli Elverum í Noregi.

„Við fáum sérleyfi hjá norskum yfirvöldum vegna dómarastarfa í Meistaradeildinni og verðum fyrir vikið í sólarhring í sóttkví í stað 10 daga,“ sagði Anton Gylfi við handbolta.is í morgun þar sem þeir félagar biðu eftir flugi frá Kastrup í Danmörku til Óslóar.

„Við verðum að vera aukadag í ferðinni meðan beðið verður eftir niðurstöðum úr skimun sem við göngumst undir í Noregi síðar í dag,“ sagði Anton Gylfi. Þeir félagar koma heim á föstudag og fara þá í tvöfalda skimun og sóttkví hér heima.

Eins og aðrir handknattleiksdómarar hér heima þá hafa þeir félagar ekki dæmt leik síðan í byrjun október að skellt var í lás á dyrunum að Íslandsmótinu. Mikil eftirvænting ríkir meðal þeirra og vel skiljanlega.

- Auglýsing -

Nýjustu fréttir

- Auglýsing -