Undanúrslitaleikir Coca Cola-bikars karla fara fram í kvöld í Schenkerhöllinni á Ásvöllum í Hafnarfirði. Eins og í undanúrslitum kvenna sem fram fór í gær þá verður flautað til leiks klukkan 18 í dag með viðureign Aftureldingar og Vals. Tveimur og hálfum tíma síðar leiða Fram og Stjarnan saman hesta sína. Sigurliðin úr leikjunum mætast í úrslitaleik Coca Cola-bikarsins í Schenkerhöllinni á morgun klukkan 16.
Valur tekur nú þátt í undanúrslitum bikarkeppninnar í 29. sinn af þeim 48 skiptum sem keppnin hefur farið fram og hefur ekkert félag oftar átt lið í undanúslitum. Þar af hafa Valsmenn unnið tíu sinnum.
Andstæðingur Vals, Afturelding, er með í sjöunda sinn í undanúrslitum, þar af í annað sinn í röð. Fyrst komst Afturelding í undanúrslit keppninnar árið 1999 sem er í eina skipti til þessa sem Afturelding hefur unnið keppnina.
Fram og Stjarnan eigast við í síðari leik kvöldsins. Þrátt fyrir að Fram hafi aðeins einu sinni unnið bikarkeppnina í karlaflokki hafa lið félagsins í gegnum tíðina sett sterkan svip sinn á keppnina og er nú með í undanúrslitum í tuttugasta sinn.
Stjarnan tekur þátt undanúrslitum í fjórtánda sinn í kvöld, þar af hefur Stjarnan hampað bikarnum í fjögur skipti, síðast árið 2007. Eins og Aftureldingarmenn þá var Stjarnan einnig í undanúrslitum þegar keppnin fór fram síðast í mars 2020. Stjörnumenn unnu þá Aftureldingu í undanúrslitum, 22:21, og mættu ÍBV í úrslitaleik.
Coca Cola-bikar karla, undanúrslit
Schenkerhöllin, Ásvöllum:
Kl. 18: Afturelding – Valur – sýndur á RÚV2.
Kl. 20.30: Fram – Stjarnan – sýndur á RÚV2.
Sala á aðgöngumiðum á leikina er á appinu Stubbur.
