Dagskráin: Blað brotið eða oddaleikur?

Ef að líkum lætur verður ekkert gefið eftir í viðureign Vals og KA/Þórs í Origohöllinni í dag. Mynd/Egill Bjarni Friðjónsson

Valur og deildarmeistarar KA/Þórs mætast í dag öðru sinni í úrslitum um Íslandsmeistaratitilinn í handknattleik kvenna, Olísdeild kvenna. Flautað verður til leiks í Origohöll Valsara við Hlíðarenda klukkan 15.45.


KA/Þór vann fyrsta leikinn sem fram fór í KA-heimilinu á miðvikudagskvöld, 24:21. Valur þarf nauðsynlega á sigri að halda í dag til þess að knýja fram oddaleik í KA-heimilinu á næsta miðvikudag. Verði leikurinn jafn að loknum hefðbundnum leiktíma verður framlengt og þess vegna gripið til vítakeppni til að ná fram sigurvegara í leiknum.

KA/Þór getur í dag orðið Íslandsmeistari í handknattleik kvenna í fyrsta sinn og um leið fyrsta liðið frá Akureyri til þess að vinna titilinn. ÍBV var síðasta liðið utan höfuðborgarinnar til að vinna Íslandsmeistaratitilinn fyrir 15 árum og er í raun það eina sem ekki er staðsett á höfuðborgarsvæðinu sem hefur orðið meistari.


Viðureign Vals og KA/Þórs sem fram fór í Olísdeildinni í Origohöllinni í vetur lauk með jafntefli, 23:23. Lovísa Thompson skoraði átta mörk fyrir Val í þeim leik og Þórey Anna Ásgeirsdóttir sex mörk. Rut Arnfjörð Jónsdóttir var atkvæðamest hjá KA/Þór með níu mörk og Ásdís Guðmundsdóttir og Kristín Aðalheiður Jóhannsdóttir voru næstar með fjögur mörk hvor.


Leikur dagsins, 2. úrslitaleikur um Íslandsmeistaratitil kvenna:
Origohöllin: Valur – KA/Þór, kl. 15.45 – sýndur á Stöð 2 Sport.

- Auglýsing -

Nýjustu fréttir

- Auglýsing -