Fyrsti leikur Coca Cola-bikarkeppninnar í handknattleik á því keppnistímabili sem nú stendur yfir fer fram í kvöld þegar Fram og ÍBV mætast í 32-liða úrslitum í karlaflokki í íþróttahúsi Framara klukkan 18.
Á morgun verður keppninni haldið áfram með einum leik en til stóð að leikur yrðu tveir en annar var sleginn af. Sextán liða úrslit í karla- og kvennaflokki fara fram eftir miðjan febrúar.
Coca Cola-bikar karla, 32-liða úrslit:
Framhús: Fram – ÍBV, kl. 18 – sýndur á RÚV2.
Fram og ÍBV mættust í sjöttu umferð Olísdeildar karla 29. október í Framhúsinu. ÍBV vann með fjögurra marka mun, 32:28, eftir að hafa verið einu marki yfir í hálfleik, 17:16.
Vilhelm Poulsen fór á kostum í Framliðinu í leiknum og skoraði níu mörk. Dagur Arnarsson, Rúnar Kárason og Sigtryggur Daði Rúnarsson skoruðu sjö mörk hver fyrir ÍBV.
