Í kvöld ræðst hvort deildarmeisturum KA/Þórs og deildarmeisturum síðasta árs, Fram, tekst að knýja fram oddaleiki í rimmum sínum sínum við ÍBV og Val í undanúrslitum Olísdeildar kvenna í handknattleik þegar leikir annarrar umferðar undanúrslita fara fram.
Deildarmeistarar KA/Þórs mæta til leiks í Vestmannaeyjum klukkan 18 eftir eins marks tap, 27:26, í fyrsta leik liðanna í KA-heimilinu á laugardaginn. Leikir liðanna á keppnistímabilinu hafa verið jafnir og spennandi. Þau skildu jöfn, 21:21, í Vestmannaeyjum í september og KA/Þór vann með eins marks mun, 24:23, í síðari viðureigninni í KA-heimilinu í byrjun febrúar.
Valur vann öruggan sigur á Fram, 28:22, í Framhúsinu á laugardaginn. Framarar eru þar með komnir með bakið upp að veggnum eins og leikmenn KA/Þórs. Valur vann heimaleikinn við Fram í september, 28:24. Framliðið sneri taflinu við með öruggum átta marka sigri á Valsliðinu, 30:22, laugardaginn 13. febrúar.
Leika skal til þrautar í kvöld, þ.e. verði staðan jöfn að loknum venjulegum leiktíma verður framlengt.
Komi til oddaleikja eiga þeir að fara fram á laugardaginn.
Fleiri áhorfendum verður heimilt að mæta á leikina í kvöld í framhaldi af því að slakað var á sóttvarnarreglum í gær. Fyrir liggur að 300 áhorfendur mega hið minnsta vera vitni að leikjum í kvöld sem mun svo sannarlega bæta á stemninguna.
Leikir kvöldsins, Olísdeild kvenna, undanúrslit, 2. umferð:
Vestmannaeyjar: ÍBV – KA/Þór (1:0), kl. 18 – sýndur á Stöð 2 Sport.
Orighöllin: Valur – Fram (1:0), kl. 19.40 – sýndur á Stöð 2 Sport.
