Handknattleikurinn fer á fulla ferð í kvöld þegar keppni hefst í þremur deildum eftir ríflega mánaðarhlé auk þess sem karlalandsliðið verður í eldlínunni í undankeppni EM.
Ein viðureign verður í Olísdeild kvenna þar sem Stjarnan og KA/Þór mætast í TM-höllinni. Þar er um að ræða leik sem tilheyrir níundu umferð. Viðureign liðanna sem fram fór 13. febrúar dró dilk á eftir sér eins og mörgum er eflaust kunnugt. Eftir málaferli fyrir dómstólum HSÍ varð það niðurstaðan að úrslit fyrri leiksins væru strikuð út og leika skyldi á ný. Það mun semsagt eiga sér stað í kvöld.
Til viðbótar verður leikin heil umferð í kvöld í Grill 66-deild kvenna. Um er að ræða sextándu og þriðju síðustu umferð deildarinnar.
Loks fer fram upphafsleikur 14. umferðar Grill 66-deildar karla.
Olísdeild kvenna:
TM-höllin: Stjarnan – KA/Þór, kl. 19 – sýndur á Stöð2Sport.
Staðan í Olísdeild kvenna.
Grill 66-deild kvenna:
Hertzhöllin: Grótta – Fjölnir/Fylkir, kl. 19.30 – sýndur á Gróttatv.
Origohöllin: Valur U – HK U, kl. 19.30.
Varmá: Afturelding – Selfoss, kl. 19.30 – sýndur á Aftureldingtv.
Framhús: Fram U – ÍR, kl. 19.30.
Staðan í Grill 66-deild kvenna.
Grill 66-deild karla:
Dalhús: Vængir Júpiters – Selfoss U, kl. 20 – sýndur á Vængir Júpiterstv.
Staðan í Grill 66-deild karla.
Íslenska karlalandsliðið stendur í stórræðum í dag. Liðið mætir landsliði Ísraels í undankeppni EM í Tel Aviv. Flautað verður til leiks klukkan 17.30 og verður leikurinn í beinni útsendingu RÚV.
