Leikmenn Víkings og Harðar mætast í oddaleik í kvöld eins og liðsmenn Fjölnis og Kríu. Mynd/Víkingur

Þrír úrslitaleikir eru á dagskrá Íslandsmótsins í handknattleik kvenna síðdegis og í kvöld. Grótta og HK mætast öðru sinni í úrslitum umspils um sæti í Olísdeild kvenna. Eftir stórsigur HK í Kórnum á laugardaginn, 28:18, verður Grótta að vinna á heimavelli í kvöld til þess að knýja fram oddaleik í Kórnum á föstudag. Vinni HK viðureignina innsiglir liðið sæti í Olísdeildinni á næstu leiktíð.

Segja má að það sjóði á keipum í undanúrslitum umspilsins í Olísdeild karla og í kvöld er hreinlega að duga eða drepast. Staðan er jöfn og oddaleikir, annarsvegar í Víkinni og hinsvegar í Dalhúsum. Leikið verður til þrautar á báðum vígstöðvum, þ.e. leikirnir verða framlengdir ef staðan verður jöfn að loknum venjulegum leiktíma.


Leikir Víkings og Harðar hafa verið jafnir. Víkingur vann eftir tvær framlengingar í fyrsta leik liðann í undanúslit. Harðarmenn voru óheppnir að vinna ekki ekki þann leik í lok venjulegs leiktíma og aftur í lok fyrstu framlengingar. Hörður vann með eins marks mun á heimavelli á laugardaginn.


Meiri sveiflur hafa verið í leikjum Fjölnis og Kríu. Kría vann með sjö marka mun, 27:20, í Dalhúsum í síðustu viku. Fjölnir svaraði með stórsigri í Hertzhöllinni á Seltjarnarnesi á laugardaginn, 34:21.


Rýmkað var á samkomutakmörkunum frá og með miðnætti. Þar af leiðandi geta talsvert fleiri áhorfendur mætt á leikina sem er hið besta mál. Áhorfendum ber þá áfram að bera grímur fyrir vitum sér.


Úrslit umspils um sæti í Olísdeild kvenna:
Hertzhöllin: Grótta – HK, kl. 19.30 (0:1).

Undanúrslit umspils um sæti í Olísdeild karla:
Víkin: Víkingur – Hörður, kl. 17.30 (1:1).
Dalhús: Fjölnir – Kría, kl. 19.30 (1:1).

- Auglýsing -

Nýjustu fréttir

- Auglýsing -