Dagskráin: Uppgjör verður ekki umflúið

Mynd/Egill Bjarni Friðjónsson

Uppgjör verður í KA-heimilinu í dag þegar deildarmeistarar KA/Þórs og ÍBV mætast í oddaleik í undanúrslitum Olísdeildar kvenna í handknattleik. Flautað verður til leiks klukkan 15 og leikið til þrautar. Annað liðið fer áfram í úrslitaleikina við Val um Íslandsmeistaratitilinn. Hitt situr eftir með sárt ennið. ÍBV vann fyrsta leikinn í KA-heimilinu á sunnudaginn með eins marks mun, 27:26. Deildarmeistarar KA/Þórs svöruðu fyrir sig í Vestmannaeyjum á miðvikudaginn með þriggja marka sigri, 24:21, eftir að hafa skorað þrjú síðustu mörk leiksins.

Hinn leikur dagsins á Íslandsmótinu verður á milli Víkinga og Kríu í úrslitum um sæti í Olísdeild karla á næstu leiktíð. Verður þetta fyrsta viðureign liðanna og fer hún fram í Víkinni og hefst klukkan 14. Bæði lið komust áfram úr undanúrslitarimmum sínum eftir oddaleiki við Hörð og Fjölni. Víst er að hvorki leikmenn Víkings eða Kríu slá hendinni á móti sæti í Olísdeildinni.

Umspil um sæti í Olísdeild karla, 1. leikur:
Víkin: Víkingur – Kría, kl. 14 – sýndur á Víkingurtv.

Undanúrslit Olísdeildar kvenna, oddaleikur:
KA-heimilið: KA/Þór – ÍBV, kl. 15 – sýndur á Stöð 2 Sport.

- Auglýsing -

Nýjustu fréttir

- Auglýsing -