Þýski markvörðurinn Phil Döhler lék ekki með FH-ingum gegn KA í Olísdeildinni í gærkvöld. Hann tognaði á lærvöðva fyrir viku, daginn fyrir viðureignina við Hauka sem var skýringin á því að Döhler var ekki nema skugginn af sér í leiknum. Eftir því sem næst verður komist er afar ósennilegt að Döhler leiki á ný með FH-liðinu fyrr en í úrslitakeppninni.
Skarð er fyrir skildi hjá FH-liðinu í fjarveru Döhler sem hefur verið einn besti markvörður Olísdeildarinnar síðan hann kom til félagsins sumarið 2019 frá Magdeburg. Döhler er með 33% hlutfallsmarkvörslu á leiktíðinni samkvæmt tölfræði HBStatz og fengið á sig að jafnaði 23 mörk í leik.
Birkir Fannar Bragason stendur vaktina í fjarveru Döhler auk varamarkvarðarins Júlíusar Freys Bjarnasonar. Birkir Fannar hættir í lok þess tímabils og Svavar Ingi Simgundsson kemur í hans stað.
FH á tvo leiki eftir í Olísdeildinni, gegn ÍR í Austurbergi á mánudaginn klukkan 16 og á móti ÍBV í Kaplakrika á fimmtudaginn klukkan 19.30.
Fyrri leikir átta liða úrslita Olísdeildar karla fer fram 31. maí og 1. júní.
