Dómari ársins í fjórtánda skipti á fimmtán árum

F.v.: Guðmundur B. Ólafsson formaður HSÍ, Anton Gylfi Pálsson, Jónas Elíasson og Reynir Stefánsson varaformaður HSÍ. Mynd/HSÍ

Anton Gylfi Pálsson og Jónas Elíasson eru dómarar ársins í Olísdeildum karla og kvenna keppnistímabilið 2021/2022. Þeir fengu viðurkenningar því til staðfestingar í verðlaunahófi HSÍ sem haldið var í Mínigarðinum í hádeginu í dag.


Þetta er í fjórtánda sinn sem Anton Gylfi verður fyrir valinu og í sjöunda skipti eftir að hann hóf samstarf við Jónas Elíasson sem þeir félagar þykja skara framúr öðrum dómurum deildanna. Anton Gylfi hreppti einnig hnossið í sjö skipti meðan hann dæmdi með Hlyni Leifssyni.


Aðeins einu sinni á síðustu 15 árum hefur dómarapar náð að skáka Antoni og félaga hans. Það átti sér stað fyrir fimm árum þegar Heimir Örn Árnason og Sigurður Hjörtur Þrastarson voru valdir besta dómaraparið.


Anton á enn nokkuð í land til að skjóta Stefáni Arnaldssyni ref fyrir rass. Stefán var nítján sinnum valinn dómari ársins með þremur mismunandi samherjum, fyrsta ásamt Ólafi Erni Haraldssyni, svo með Rögnvald Erlingssyni og síðustu árin áður en flautan var lögð á hilluna með Gunnari Viðarssyni, síðast árið 2006.


Anton og Jónas eru hvergi af baki dottnir með flauturnar og spjöldin að vopni. Þeir halda ótrauðir áfram að dæma á næsta keppnistímabili og staðfestu þau áform sín við handbolta.is í verðlaunahófinu í dag.


a>
- Auglýsing -

Nýjustu fréttir

- Auglýsing -