Landsliðsmaðurinn Kristján Örn Kristjánsson, Donni, mætti til leiks á ný hjá PAUC-Aix eftir meiðsli þegar PAUC gerði jafntefli við Nantes, 24:24, í efstu deild franska handknattleiksins en leikið var í Nantes.
Donni, meiddist á ökkla fyrir tveimur vikum, og mætti á sínu fyrstu æfingu með liðinu fyrir helgina. Hann skoraði tvö mörk í fjórum skotum í leiknum í dag og virðist óðum vera að nálgast sitt fyrra form. Þetta var fyrsti leikur Donna með PAUC eftir heimsmeistaramótið í Egyptalandi í síðasta mánuði.
Donni og félagar voru þremur mörkum undir að loknum fyrri hálfleik í Nantes í dag en tókst að snúa vörn í sókn í síðari hálfleik.
PAUC er í þriðja sæti frönsku deildarinnar með 22 stig eftir 13 leiki. Montpellier er tveimur stigum fyrir ofan með 24 stig auk þess að hafa lokið 14 leikjum. PSG er efst með 30 stig eftir 15 leiki, hefur ekki tapað stigi. Limoges er í fjórða sæti með 22 stig eftir 16 leiki. Nantes situr í fimmta sæti með 18 stig að loknum 13 leikjum.
