Ef leikskýrsla ræður er grundvallaratriðum kastað á glæ

Mynd/Egill Bjarni Friðjónsson

„Ef leikskýrsla ræður meira um úrslit leikja en það sem raunverulega gerist á vellinum er grundvallaratriðum íþróttarinnar kastað á glæ,“ segir m.a. í yfirlýsingu sem Handknattleiksdeild Stjörnunnar hefur sent frá sér vegna huldumarks eða ranglega skráðs marks í viðureign Stjörnunnar og KA/Þórs í Olísdeild kvenna í febrúar sl. Markið varð til þess að KA/Þór var marki yfir þegar leiknum lauk.


Vegna þessa hafa verið rekin kærumál fyrir dómstól HSÍ og áfrýjunardómstól HSÍ þar sem niðurstaðan hefur verið á báða vegu. Síðast var það niðurstaðan áfrýjunardómstóls HSÍ að leikurinn skuli leikinn á ný. Enn er málið fyrir dómstólum innan HSÍ en niðurstöðu er að vænta í vikunni, eftir því sem fram kemur í fyrrgreindri tilkynningu Stjörnunnar.


„En í þessu tilfelli er sennilega um að ræða eitt áhrifamesta mark í sögu íslensks kvennahandbolta og jafnvel handbolta yfir höfuð þar sem að sá möguleiki er fyrir hendi að umrætt mark skeri úr um það hvaða lið verði Olísdeildarmeistari 2021,“ segir ennfremur í tilkynningunni sem lesa má í heild sinni hér fyrir neðan.


„Huldumark í TM höllinni – um hvað er deilt og hvað er Stjarnan að kæra?!


Við hjá handknattleiksdeild Stjörnunnar höfum fengið ýmsar fyrirspurnir vegna atviks sem átti sér stað í leik Stjörnunnar og KA/Þór í Olísdeild kvenna þann 13. febrúar sl. í TM höllinni í Garðabæ.


Samkvæmt upptökum og öðrum gögnum frá umræddum leik er það óumdeilt að bæði lið skoruðu 26 mörk með löglegum hætti í leiknum. Hins vegar voru gerð mistök á ritaraborði sem fólust í því að mark sem Stjarnan skoraði var ranglega skráð á lið KA/Þórs. Þegar dómarar fá ábendingu um að það vanti mark hjá Stjörnunni þá fara þeir fram á við ritaraborð að bæta eigi marki við hjá Stjörnunni sem var gert en markið hins vegar ekki tekið af KA/Þór.


Grundvallarástæða þess að Stjarnan kærir framkvæmd þessa leiks er að það er okkar staðfasta trú að það sem gerist inni á vellinum og þau mörk sem þar eru skoruð eru það sem eigi að ráða úrslitum leikja en ekki það sem skráð er á leikskýrslu ef það er ekki í samræmi við það sem raunverulega gerðist.


Ef leikskýrsla ræður meira um úrslit leikja en það sem raunverulega gerist á vellinum er grundvallaratriðum íþróttarinnar kastað á glæ. Slíkt er íþróttinni hættulegt og bíður upp á hættu að upplýsingar séu ranglega skráðar á skýrslu með vísvitandi hætti til að hafa áhrif á úrslit leikja.


Er Stjarnan að kæra sjálfan sig? Nei, það hefur komið skýrt fram í málflutningi fyrir dómi HSÍ að litið er á starfsfólk ritaraborðs sem fulltrúa HSÍ á leikjum en ekki fulltrúa heimaliðs. Enda þurfi þau að hafa fengið þjálfun og viðurkenningu frá HSÍ til að sinna störfum á ritaraborði og fara eftir tilmælum dómara og eða eftirlitsdómara.


Í málflutningi Kvennaráðs KA/Þórs er því m.a. haldið fram að engin leikregla hafi verið brotin í umræddum leik og því ekki tilefni til að kæra leikinn. Það er hins vegar ekki rétt, leikregla 9.1 segir skýrt til um hvernig hægt er að skora löglegt mark í handknattleik. Þar er útskýrt með nákvæmum hætti hvernig bolti þarf að fara yfir línu til þess að um löglegt mark sé að ræða. Það er algjörlega skýrt samkvæmt öllum gögnum að boltinn fór 26 sinnum yfir marklínu hjá hvoru liði í leiknum. Þegar lögleg mörk er talin samkvæmt upptökum þá fór leikurinn jafntefli 26 – 26.


Til skýringa má nefna það að skráning marka er skv. leikreglum á ábyrgð dómara en eftir að farið var að taka hraða miðju þá færðist sú ábyrgð í raun og veru á ritaraborð án þess að reglunum hafi verið breytt í samræmi við raunverulega framkvæmd. Það er okkar mat að nauðsynlegt uppfærsla á reglum HSÍ sé aðkallandi og gerðar séu ráðstafanir til þess að hægt sé að skera úr um slík vafaatriði á staðnum í hvejum leik með því að nýta upptökur og nútímatækni auk skráning í HB stats.


Það skal tekið fram að umrætt atvik er ekki einstakt í sögu handbolta í efstu deildum þ.e. að mark sé ranglega skráð eða vanskráð á lið. En í þessu tilfelli er sennilega um að ræða eitt áhrifamesta mark í sögu íslensk kvennahandbolta og jafnvel handbolta yfir höfuð þar sem að sá möguleiki er fyrir hendi að umrætt mark skeri úr um það hvaða lið verði Olísdeildarmeistari 2021.


Stjarnan telur því mjög mikilvægt að fá skorið úr um þessi atriði með skýrum hætt og skapa umgjörð sem er skýr og til þess fallin að íþróttin fái að njóta sín með því að láta það sem raunverulega gerist á handboltavellinum ráða úrslitum.


f.h. stjórnar handknattleiksdeildar Stjörnunnar
Lárus Halldórsson
varaformaður.“

a>
- Auglýsing -

Nýjustu fréttir

- Auglýsing -