Birkir Benediktsson stórskytta Aftureldingar hefur skrifað undir nýjan samning við Aftureldingu. Mynd/Raggi Óla

„Það eru að verða komnir fimm mánuðir síðan ég fór í aðgerð. Endurhæfing hefur gengið vel. Ég er allur að koma til en enn sem komið er er ekki hægt að setja tíma á hvenær ég mæti til leiks með Aftureldingu. Kannski eftir einn til tvo mánuði,“ sagði Birkir Benediktsson örvhenta stórskytta Aftureldingar þegar handbolti.is hitti hann að máli rétt fyrir helgina. Birkir varð fyrir því óláni að slíta hásin daginn fyrir fyrsta leik Aftureldingar í Olísdeildinni í september.


„Ég hef aðeins verið með strákunum á æfingum en látið nægja að skokka og skjóta á markið. Það var vinstri hásinin sem slitnaði og þess vegna get ég aðeins stokkið upp og skotið á markið. Það er fínt aðeins að komast í boltann og hreyfa sig aðeins. Fá tilfinninguna aftur,“ sagði Birkir. Hásinin var saumuð saman. Eftir það var Birkir með fótinn í gifsi í þrjár vikur áður skipt var yfir í göngugifs í fimm vikur.

„Um leið og ég losnaði úr gifsinu hófst endurhæfingin skref fyrir skref fram til þessa dags,“ segir Birkir og benti m.a. að fótleggurinn hafi rýrnað um nærri því helming á síðustu mánuðum. „Vinstri fótleggurinn er að styrkjast smátt og smátt. Maður hefur verið og er að gera allskyns æfingar til að ná upp styrknum á nýjan leik.“


Birkir sagði að sannarlega hafi keppnistímabilið farið úr skorðum hjá sér vegna þessara slæmu meiðsla. Nú væri farið að sjá fyrir endan á þeim tíma. „Ef einhverntímann var tími til þess að verða fyrir þessu þá var það núna vegna þess að æfingar lágu niðri mánuðum saman auk þess sem ekkert var leikið á Íslandsmótinu um enn lengra skeið vegna kórónuveirunnar.


Ég er bjartsýnn og vongóður um að ná eitthvað af leikjum með strákunum þegar lengra kemur fram á keppnistímabilið sem á eftir að teygjast fram undir sumarið,“ sagði Birkir Benediktsson, stórskytta Aftureldingar í samtali við handbolta.is.

- Auglýsing -

Nýjustu fréttir

- Auglýsing -